Maxay ka wada-hadleen madaxweynaha HirShabeelle iyo danjiraha Qadar ee Soomaaliya?

0

Muqdisho (SK)-Madaxweynaha Hirshabelle Maxamed Cabdi Waarre oo maalmahaan howlo shaqo ku jooga Muqdisho ayaa kulan la qaatay danjiraha Dowladda Qadar ee Soomaaliya mudane Xasan Xamza, Iyo Mas’uuliyiin Ka kala socday Hey’adda waddooyinka Qadar iyo hey’adda lagu wado in dhowaan ay bilowdo dhismaha Wadada isku xirta Magaalooyinka Muqdisho iyo Jowhar, waxaana ay Ka wada hadleen arrimo kale duwan Oo quseeya horumarinta deegaannada Hirshabelle.

Ugu horeyn madaxweyne Waarre ayaa Ka mahadceliyay caawimaada Dowladda Qadar ee Soomaaliya gaar ahaan Mashruucani lagu Dhisayo Wadadaasi Oo muhiim u ah Dadka Reer Hirshabelle iyo Guud ahaan Umadda Soomaaliyeed, waxaana Uu sharaxaad Ka siiyay Hirshabelle Juqraafi ahaan halka Soomaaliya ay kaga taalo, iyo kheyraadka eebe Uu Ka maneystay, iyo fursadaha maalgashi ee Ka jira Dowlad Goboleedka.

Madaxweynaha Iyo Xubnahani Ka socday dowladda Qadar ayaa Ka wada hadlay dar dar galinta mashaariicda horumarineed gaar ahaan dhismaha Wadada isku xirta Muqdisho iyo Jowhar Oo uu bur bur xoog leh Ka jiro.

Xubnahani Ka socday Dowladda Qadar ayaa muujiyay Sida ay Uga go’antahay dar dargalinta mashaariicda Horumarineed Oo dalka Ka fulinayaan taasi Oo Ku kaceysa 200 oo Milion, waxaana madaxweynaha ay u sheegeen Hirshabelle in ay kala shaqeyn doonaan dhinacyada Horumarinta wax soo saarka iyo arrimo kale Oo muhiim u ah kaabayaasha dhaqaalaha.

Kulanka ayaa waxaa madaxweynaha Hirshabelle Maxamed Cabdi Waare Ku wehlinayay Wasiirka Wasaaradda Qorsheynta iyo Horumarinta Jamaal Maxamed Xasan iyo Mas’uuliyiin Ka tirsan Madaxtooyada Hirshabelle, waxaan Uu Ku soo dhamaaday jawi is afgarad ah.

_SOOMAALIKABE_

Soomaalikabe@gmail.com